العودة   منتديات ساحرة الأجفان > ..:: بــوح المشــآعــر ::.. > مملكة الشعر - همس القوافي - اشعار مكتوبة - قصائد متنوعة - قصائد غزل -قصائد حزن - قصائد مدح

الملاحظات

مملكة الشعر - همس القوافي - اشعار مكتوبة - قصائد متنوعة - قصائد غزل -قصائد حزن - قصائد مدح مملكة الشعر , همس القوافي , اشعار مكتوبة ,قصائد متنوعة , قصائد رومانسية , قصائد رثاء , قصائد شعر جميلة , مملكة الشعر - همس القوافي - اشعار مكتوبة - قصائد متنوعة

أشعار بدر بن عبد المحسن 2014 - تحميل قصائد الشاعر بدر بن عبدالمحسن الجديده 2014

مملكة الشعر - همس القوافي - اشعار مكتوبة - قصائد متنوعة - قصائد غزل -قصائد حزن - قصائد مدح

إضافة رد
 
أدوات الموضوع إبحث في الموضوع انواع عرض الموضوع
قديم 03-04-2014, 09:47 AM   المشاركة رقم: 1
angle girl

البيانات
angle girl متواجد حالياً
التسجيل: Apr 2012
العضوية: 1045
الدولة: gين مآتروح تلقآنيـے
أخر تواجد [+]
عدد النقاط: 715
angle girl is a splendid one to beholdangle girl is a splendid one to beholdangle girl is a splendid one to beholdangle girl is a splendid one to beholdangle girl is a splendid one to beholdangle girl is a splendid one to beholdangle girl is a splendid one to behold


المنتدى : مملكة الشعر - همس القوافي - اشعار مكتوبة - قصائد متنوعة - قصائد غزل -قصائد حزن - قصائد مدح
افتراضي أشعار بدر بن عبد المحسن 2014 - تحميل قصائد الشاعر بدر بن عبدالمحسن الجديده 2014

أشعار بدر بن عبد المحسن 2014 - تحميل قصائد الشاعر بدر بن عبدالمحسن الجديده 2014




عزيزى العضو \ الزائر لايمكنك مشاهده الروابط الا بعد الرد

(قــــصة حــــب)

فـ كل قصة حب أحلام ومدينة ..
ليل ونخيل وهبوب ..
لكل قصة حب لو كانت حزينه ..
أجمل ألوان الغروب ..
ناظري ضيّ الحوانيت القديمه ..
ونقش أبواب البيوت ..
كلها شعر ومواعيدٍ قديمه ..
وصوت قلبـي اللي يموت .. وما يموت ..
لكل قصة حب .. عذال وحسود ..
ليه تخدعنا الأماني .. والليالي السود .. سود
إشعلي جمر العناد .. قربـي معاد أشوفك ..
لا يفرقنا السواد ..
ارسمي وجهي بكفوفك ..
ولا تجرّحنا عيون الليل .. وحروف النميمه
ولا يعذبنا السكوت ..
إن عطشنا أو شربنا الدمع ديمه ..
للهوى بنحيا ونموت ..
لكل قصة حب أشواك وورود ..
وليه نصرخ من ألمها .. وكلها تنبت في عود ..
ناظري هذا قمرنا لو تغطيه الغيوم ..
وناظري هذا شجرنا مهما تحرقه السموم ..
ولو تجرّحنا عيون الليل وحروف النميمه ..
ولو يعذّبنا السكوت ..
إن عطشنا أو شربنا الدمع ديمه ..
للهوى بنحيا ونموت ..



----------------------------------


(الــــعمر أحـــبك)




لليل احبك مابقى فـي السمـا نـور
والى ضواني الليل .. للصبح أحبـك
واللحظة اللي كلهـا عنـد وغـرور
أشوف قبري بين عينـك .. وقلبـك
في صدري سراجٍٍ حزينٍٍ .. ومكسور
رغم المطر والريح .. شلته في دربك
والله مابـه غيـر لوعاتـي قصـور
وخوفـي عليـك الله ربـي وربـك
ما بي جهد ابني على صمتك جسور
لا حيرتني أسباب سلمـك وحربـك
العمر أحبك .. مابقى فينـي شعـور
والى جفاني العمر .. وشلون أحبـك




---------------------------------

(الفــــجــر البعـــيد)

نامت عيونك
وصحى الليل مظنونك أغاني
قصّت جناح الثواني غيبتك
وصارت الساعة أماني

وآهـ ..آهـ
أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد .. نامت عيونك

إسهر معي ليلة
حاول تحس بلوعتي ليلة
عد النجوم وش كثرها.. ياللي بقلبي كثرها
نام .. القمر فـ وسادتك نام
ليتك تغير عادتك
خل القمر ليله.. يسهر معي ليله

أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد.. نامت عيونك

يا ساحر البسمه .. أساهرك نجمه
وابسمعك كلمه .. كلمه و لو كلمه
قم نادني .. يالله عسى تحتاجني
وإن مر ليلي ما سألت

وإن زاد ظلمك ما عدلت

آهـ.. آهـ
أنا حروفي في غيابك
لا هي حكي ولا هي قصيد
أكتب الظلما وأعيد

وإنت ياالفجر البعيد.. نامت عيونك

----------------------------------------


(كـــــــــفاك غــــرور)

صحيح ان السحاب انتي ..
واعشاب الربيع انتي ..
وأجمل من على هذا التراب .. انتي
وفـ عز الليل لو بنتي يطير الصبح ..
من كف الربى عصفور ..
ولكن الليالي تدور ..
كفاك .. غرور
سقاني صوتك البارح .. مرار الحزن والترحال
صحيح ان البحر مالح .. ولكن العطش قتال
سألتك يا ظماي .. أمطار
سألتك عن هواي .. أخبار
سألتك كلمتين أعذار .. ولكن ما تعذرتي ..
وحقك لو تكبرتي ..
صحيح ان السحاب انتي ..
واعشاب الربيع انتي ..
وأجمل من على هذا التراب انتي ..
انا جرح .. وحنين وهمس
وقلبٍ ينبض بصدري ..
ولا ادري من حبيبي .. الشمس
ولا ودي بعد ادري ..
يكفيني دفى انسان ..
يشاركني فرح واحزان ..
ونورك فـ السما لو بان .. أشوفه مثل كل الناس
وأحسه .. مثل كل الناس
وصحيح ان السحاب انتي ..
واعشاب الربيع انتي ..
وأجمل من على هذا التراب انتي ..
وفـ عز الليل لو بنتي .. يطير الصبح ..
من كف الربى عصفور ..
ولكن الليالي تدور كفاك .. غرور


---------------------------------


(رســــــــاله)





إلى من .. يهمها أمرى .. إلى من ..
رجاءً .. إلى متى صبري .. رجـاءً
أنا لن .. اشتكي .. همي لغيـرك ..
ياروحي .. اشتكي روحي على من ..
رسالـه .. حبـرهـا .. دمــي ..
رساله .. تصرخ ابهمي .. إلى من ..
سألت الرمل .. في دروب القوافل ..
سألت الجدب .. عن لون السنابـل ..
سألت الناس عن وجهـك حبيبـي ..
عن الشمس .. ومتى تشـرق مسـاءً
أحبـك .. يالصـحـاري الـلـي ..
فـهجيرك .. احترق كلـي .. وفـاءً
كتبـت لواحـة عيونـك رسايـل ...
بسراب الدمع ... وانفاس القوايـل ..
كتبـت وذي تـرى .. اخـر رسالـة
أحبك .. وان نسيتينـي .. وداعـاً ..


----------------------------

(رعــــــشة هــــدب)

ماقلت له ... يا حلوتي ماقلت له ...
المشكله ... إني أختلف ...
لا طروا اسمك من الوله ...
وجهك تغيّر ... نظرتي ...
وتضحك في عيني يا عبرتي ...
وبعض الحكي ما اتحمله ...

ما اكذب عليك ... البارحه شافوك ...
رعشة هدب لفته ...
البارحه شافوك ... في النوم الذي عفته ...
وماحد ٍ يقول ... شافك معي مره ...
طيفك متى ... يكفيني من شره ...
باكر إلى مروا علي ربعي بقول :
إن السما ما هي سما ....
واغيّر اوقات الفصول ...
ان صدقوني .. ما دروا إنك هواي ...
وإن عاتبوني ... صارت عيونك سماي ...


-------------------------------

(لاتـــــقول)




لا تقول ودعتنـي داري
بالحيل مالي عليك عتاب
مريت في موعدك ساري
وقفت لين النجم ماغـاب
الليل تحت الشجر عاري
والفجر غطي السما بثياب
والريح في كفوفها الذاري
تدفن ارسوم الوعد بتراب
مريت ماللولـه طـاري
ووقفت ماللنـدم اسبـاب
مدري تعودت مشـواري
أو خان بي قلبي الكذاب


-----------------------------

(لاتـــــــشد القــــيد)

لا تشد القيد ...
تجرح يدي ... أو تجرح القيد ...
قيدك غدى يوجع يدي ...
سجني أنا انت ... وسجنك أنا ...
والحب ... الحب عبدي وسيدي ...
لا ... لا تشد القيد ...
دمي ... جرى ... دمك ...
همي إني اشوفك في يدي ...
وإلاّ يدي همّك ...
في معصمي صرت ...
إنت السجين في معصمي ...
وكانك تصبرت ... أنا مقوى الصبر ...
دمعي في عيني ... وصرختي تملا فمي ...
سجني وسجاني ... أحزانك احزاني ...
وشلون ابنساك ... وشلون تنساني ...
محبوس في عيونك دمع ...
وزنزانتي ... تقطيبة الحاجب ...
وحاول توارى في الجفا ...
يا وجهه الصاحب ...
بتشوف نفسك في يدي ...
قيدٍ رقيق ...
قيدٍ سلب حريتي ...
ليته طليــق ...
يا صاحبي ... ما به ابد قيدٍ طليق ...
لا ... لا توجع يدي ...
سجني انا انت ... وسجنك انا ...
والحب ... الحب عبدي وسيدي ...


(لــــو تغـــيبي)



لو تغيبـي ولو رحـل وجهك حبيبـي

في غيابـي عنك أشوفك .. وفي عذابـي منك أشوفك

صـدقينـي مـا نـقـص هالليـل بعدك إلا قمـرا

وما فـقـدت من النهـار إلا شعاع الشمس بكـرا

واجمل الناس حبيبـي ..

لو تغيبـي لو رحـل وجهك حبيبـي

تصغر الدنيا وتضيـق

كلّ مافي الدنيا أعرفه إلا بيتـي والطريق

أنا أحبك ذا نصيبـي .. إبعدي عني وغيبـي

صـدقينـي مـانـقـص هالليـل بعدك إلا قمـرا

ومافـقـدت من النهـار إلا شعاع الشمس بكـرا

لك ليـالي ما سألتـي .. ولي ليـالي ما سـألت

ولو دريت إنك زعلتـي .. كان أفرح مـازعـلت

بس داري مافي قلبـك إلا قلبـك

واختياري إني أحبـك والا أحبـك

ومن عذاب الحب يكفـي لو تجرّح قلب واحد

وإنتي يا حبـي وضعفـي لا يهمك كله واحد

لجل تتغير فصول .. ويبكي الغيـم في عيونـي

وتزهر جبال وسهول .. اضحكي بيـّا وبدونـي

وصدقينـي مـا نـقـص هالليـل بعدك إلا قمـرا

ومافـقـدت من النهـار إلا شعاع الشمس بكـرا


------------------------------

(ســــــــلامة رماحــــك)




سلامة رماحـك اللـي جرحهـا غالـي
طعنتني غاضـب ليـن أنكسـر رمحـك
لو قلت لي كان أجـرح حالـي بحالـي
لا عاش قلبٍ جزع وارتاع من جرحـك
لاجلك جروحـي غـدن اليـوم عذالـي
ذميت ظلمك وأنـا مـن عادتـي مدحـك
ياليت لي ذنـب وألقـى علقمـك حالـي
وياليت بك عدل..وأرضى فـالهوى ذبحك
ياسيـدي وإن نويـت تزيـد غربـالـي
قلي وأنا أبعد ظلامي عن سنـا صبحـك
لو ما يسرك أطـو ل الشمـس بجبالـي
مايكفـي إن عشقـت جبالـك وسفحـك
كل الهـوى بالهـوى يزهـى ويختالـي
وأنا الذي فـي خسـارة عزتـي ربحـك
ياعـل ماتزهرالأشجـار فـي رمـالـي
لو أعتذر عن شموخي في رجا صفحـك
سلامة رماحـك الـي جرحهـا غالـي
طعنتني غاصـب ليـن أنكسـر رمحـك


---------------------------

(جـــــــمرة غــــضى)

جمرة غضى .. أضمها بكفي
أضمها حيل . .
أبي الدفا .. لو تحترق كفي
وأبي سفر لليل
بردان أنا تكفى .. أبي احترق بدفا
لعيونك التحنان .. فعيونك المنفى
جيتك من الإعصار .. جفني المطر .. والنار
جمرة غضى
والله الجفا برد .. وقل الوفا برد
والموعد المهجور ما ينبت الورد
ياحبي المغرور .. ياللي دفاك اشعور
رد القمر للنور .. واحلى العمر .. في وعد
بردان .. بردان أنا تكفى.. أبي احترق بدفا
يا أول الحب .. شفتك أنا مره
واهديت لك قلب
ورديت لي جمرة
ومن يومها كان الرحيل
وليل الشتا .. القاسي الطويل
وآه يا الحنين
لليل باب له حارسين
برد وسحاب

-------------------------------

(الـــرســـايـــل)

وليله كانت الفرقا
و قالت لي .. فـ أمــان الله
و ليله ذكرها يبقى
على جرحي .. و لا انساه
و جت تاخذ رسايلها ..
و خصله من جدايلها
و تديني جوباتي
بقايا عمر بسماتي
و قالت لي .. فـ أمــان الله

في ليله كنها الليله عرفتك بسمتي و فجري
و ليله زي ذي الليله و هبتك في الأمل عمري
و يا ليت البسمه ما كانت ولا الاحساس
وياليت الدنيا خانتني و كل الناس
و لا خنتي هواي انتي
و لا قلتي .. فـ أمـان الله

لا تردين الرسايل ويش اسوي بالورق
و كل معنا للمحبه ذاب فيها و احترق
لو تركتيني في ليله بسمتك عند الرحيل
دمعة العين الكحيله عذرها الواهي دليل
و ليله كانت الفرقا
و قالت لي فـ امان الله

---------------------------

(الــــهوى لـــو تمــــنى)



الهوى لو تمنى .. سلوته مستحيلـه
واعذاب المعنى كان روحـه عليلـه
لا بغى الوصل منا من ضافي الجديله
عود موزٍ .. تثنى وش رماني بسبيله
سهم عينه رمنّى والرموش الطويلـه
خبروا الزين عنّى لي نشد عن قتيلـه
كل خلٍ .. تهنى في الهوى مع خليله
فاتنا السعد حنا يـوم نفسـه بخيلـه



---------------------------

(ســــــــاره)


من كُتب الحب العتاق .. وتاريخ القراق
وستاير الدمع الرقاق ..
جمعت قلبي غبار .. وقطع فخار ..
ومن على المرمر البارد ..
ومن ما نسته النار .. من غيمي المحروق ..
وحملت عيوني وركبت أول سفينه تبحر ..

على وجهي الاصفر .. خريفٍ طال ..
وسلال من رذاذ وملح ..
وفي صدري حجارة نسيوها بحاره ..
مروا علي فـ يوم ..
وقالوا تعال معنا .. وما كان يجمعنا ..
إلا الضياع والريح ..

راجع من الايام .. من الاحلام ..
ومن الف سناره .. مغروسة بقلبي ..
لقيت لي بشارة .. ما اغلى عطا ربي ..
أثر العمر ساره .. وموج البحر ساره ..
وكل المدى ساره ..
سافرت كل العمر .. وراجع احب سارة ..



-------------------------------

( الوله )


يطري عليه الوله .. وأطري على بالـه
يامرحبا لاضـوى خلـي علـى بابـي
هجيت حدب الضلـوع ونـوخ جمالـه
لاجله بكت دمعتي ولأجله ضحك نابـي
وكل ما ضحك لي لمحت النور في آماله
والـى تجهـم ستـرت السقـم بثيابـي
وكل ما شكى من عنى همـه وغربالـه
أقول لعـل بـه جـرحٍ مـن أسبابـي
طال الحكي ما لقيت الوصـل بوصالـه
لاني حبيبه ولا هـو أقـرب اصحابـي
ناديـت طـاري المحبـه مالنـا ومالـه
بالحيل أنا وانت ربـع وكننـا أغرابـي
يا زين كانك حزيـن .. فحالتـي حالـه
بكفيك همك وأنـا بصبـر علـى مابـي
لو الشجر له نصيـب فـبـارد ظلالـه
ماحرق القيض جفني وأنت فـأهدابـي


-------------------------

(أكذب )
صحيح اني انسى الحوداث.. والملامح .. والأسامي
لما أكتب عن آلامي .. شعر ابعد ما يكون ..
عن مجرد جرح دامي .. والأساور .. والمرايه .. والهوى القاسي الحنون ..
عندي هموم القصيدة .. غامضة .. صعبة .. عنيده ..
وانت عاشق للوضوح ..
يتعبك بحري ظلامي ..
ودك بسري أبوح .. وانا آخر همي بوح ..
تكفى لا تزيد فـ خصامي .. وقلي ما تفهم كلامي ..
انا انسى .. الحوادث .. والملامح .. والأسامي ..
2
لما أكتب أغنية مثل (الرسايل ) .. وانا أكذب ..
والخيال العذب كذب ..
كنت لازم أخفي سري وما اقول ..
إن هالمرة شعوري .. هو خيالات الحقول ..
تطرد اسراب الطيور .. عن حقيقة .. عن شعور
ما هو في حب السنابل .. انما تحت الجذور ..
كسروا العشاق بابي .. قطعوا لحمي ثيابي ..
خلعوا الأدراج .. طاحت مزهرياتي الجميلة ..
شققوا جفني كتابي ..وسألو وين ( الجديلة )
( وبسمة العين الكحيلة ) .. ما لقوا في بيتي إلا ..
ما لقوا في صدري إلا.. مالقوا في قلبي إلا ..
أمنياتي المستحيلة ..
وإني احلم .. بس أحلم ..
3
أعبر الشارع معاي .. في الرصيف الثاني قهوة ..
فيها اربع طاولات .. وحده اجلس فيها وحدي ..
ووحده للي يجي بعدي .. ووحدة لأجمل حرف عندي ..
أما رابع وحدة دايم للي مات ..
زحمة .. لكن كل من في القهوة ربعي .. كلهم ..همي ودمعي ..
ليه ما تجلس مكاني .. وهذا شوفي .. هذا سمعي ..
أطلب اقلام ودفاتر .. حاول اكتب عن حقيقة ..
ما هي وجه .. ولا مكان .. ولا دقيقة ..
أدخل الزحمة فـ ضميرك ..
لا تلفّت .. وانت ما في القهوه غيرك .. غمض الدنيا ..
وأكتب .. وإن سأل في يوم سائل .. عن معاني .. عن شعور ..
قله مابين السطور ..
وإلا تدري .. قله أكذب

--------------------------------

(آآآآآه ايالجـــــــــــــراااح )






لا جيت أنا بــ سامحك..
تبكي الجراح ما ودها..
مشتاق ودي أصافحك..
عيت يدي لا مدها...
آه. .يا لجراح .. راح اللي راح ..
وراحتي .. من يا ترى بيردها ..
يا حب.. ياذ كرى واسم..
مدري انا ابكي عليك من العذاب اوابتسم..
صدقني في يأسي .. نفسي تبي نفسي تبيك ..
لا يا دفا شمسي تبيك..
ليه خنتني ..الله عليك ..
آه يا الجراح .. راح اللي راح..
وراحتي .. من يا ترى بيردها ..
لا تحاكي عيوني .. يمطر سحاب الملح ..
ولا تلمس أشجوني .. ينبت في قلبي جرح ..
ناظرني يا خلي .. جرح انا كلي ..
وشلون أبـ ارضى الصلح ..
فصل الخريف حبي ..حزن وورق أصفر..
...ودعني يا قلبي..وخل العذاب أقصر..
آه يا الجراح .. راح اللي راح..
وراحتي .. من يا ترى بيردها ..

-------------------------------

( اوراق الزمـــن)








ادفن يدي .. تحت الثرى ..
واسقيها من جفني ارق ..
يذبل مابين اصابعي ..
عشب و ورق ..
ادفن يدي .. فوق الثرى ..
يلفها برد وسموم ..
واحس بعروقي يبست ..
ما توصل عروقي الثرى ..
ولا تشرب عروقي النجوم
وينبت على جفني سهاد ..
يذبل ورا صدري الشجن ..
اشقق اوراق الزمن ..
وانام ..
في حلقي الليله جفاف ..
شربت أيامي .. ومضت ..
واللي بقى جرحي الوفي ..
في خاطري باب يرد ..
وسراج دوبه ينطفي ..
اغطي الظلمه بظلام..
كل ما اشد اصابعي ..
على العيون المتعبه ..
جرحٍ ينام .. وجرحٍ شعر بي وانتبه ..
قام وتبعني لشرفة ظلمه بعيد ..
جاني يقاسمني السهاد .. جاني قصيد ..
ادفن يدي تحت الثرى .. فوق الثرى ..
واعيش انا بباقي يدي ..
نصفٍ يموت .. ونصفٍ درى انه يموت ..
يا سيدي .. ربي انا نقطه فـ بحر ..
علمني كيف اهوى الحياه ..
علمني كيف اهوى القدر ..
علمني بإماني اكون ..
يارب .. اكثر من بشر ..





(انتـ ـ ـ ـ ـ ـ ـ ـي حلـ ـ ـ ـ ـ مـ )






انتظرتك .. عمري كله .. وانتي حلم
ومرت الايام والله .. وانتي حلم..
ليه تأخرتي علي ..
توهي مره واسالي ..
كوني في غير الزمان .. والا في غير المكان
كوني عمري .. عمري كله..
اللي باقي .. واللي كان..
انتظرتك عمري كله .. وانتي حلم ..
كل نجمه شعشعت والقلب عتمه .. كانت انتي ..
كل حرفٍ حرك شفاهي بكلمه .. عنك انتي ..
وكل حبي اللي مضى والحب قسمه .. منك انتي ..
كانوا الاحباب ظلك .. بعض احساسك ونورك ..
ما عرفتك يوم كلك .. ياللي في غيابك حضورك ..
انتظرتك عمري كله .. وانتي حلم ..
هذا إنتي .. قولي والله إنه إنتي ..
وين غبتي ؟! .. عني هذا الوقت كله ..
وين كنتي ؟! ..
شيبت عيني طيوفك .. وما أصدق إني أشوفك ..
ياللي قلبي في كفوفك .. نقش حنا ..
وفي جديلك عطر ورد ..
آتمنى .. لو تكوني في فراغ اعيوني وعنى
وفي سموم ضلوعي برد ..
ليه تأخرتي علي ..
وما طرى لك تسألي ..
ليه نأخرتي علي .. وما طرى لك تسألي ..
إنتظرتك عمري كله عمري كله .. وانتي حلم

-----------------------------------------------


(أحبابك سروا )


مابه احد غيري يابنت.. احبابك سروا..
لاتسأليني تغيروا.. يمكن نسوا او مادروا..
ياحلوتي ضاع الوعد.. وباكر بعد..
مري على دروب الجراح.. وتلقين احد غيري..
بالله لاتبكين عندي.. والى رحتي سوى اللي تبين
مالك عزى.. فـ قلبي الحزين
محتار انا اسكت.. ومدري ايش اقول
لاني سبب جرحك.. ولاعندي الحلول
لكن ابوصيك بصبر.. لابد للغايب عذر
وياحلوتي ضاع الوعد.. وباكر بعد...
مري على دروب الجراح.. وتلقين احد غيري
غطي سنا خدك بشال الليل..
وغيبي ياشمس اللي ضيها لغيري..
اه .. لو تعرفي وش كثر انا احبك.. لو كنتي تدري بي
ياعيونها السود.. مابه احد موجود.. غيري انا الموعود
جرحي.. وتعذيبي..
ياحلوتي ضاع الوعد.. وباكر بعد...
مري على دروب الجراح.. وتلقين احد غيري...

---------------------------------

(حسايف )

التفت ...
وتوها ... توها ما اختفت ...
ماكساها الليل ... باللون الحزين ...
التفت ... وتعالت صرخته ...
في نظرته ...
صاح ... لكن بالنظر ...
وانكسر .... شوفه عثر ...

حسايف .. تذبل الضحكه وهى بين الشفايف ..
تذبل الفرحه وتضيع ...
ويصبح الكون الوسيع ...
مايكفي خطوتين .. لاكساه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع ..
عطــرهــا ..
وعمرها ... ما جت على وقت الوعد ...
إلا ذاك اليوم ...
و عمرها ... ما بكت .. و ما ضحكت ...
ما حكت له .. واسكتت
مثل ذاك اليوم ...
كانت أجمل من خياله ... كانت انضر ...
كانت أكثر ... من أماني عمره الظامي حنين ..
و اختفت ... من كساها الليل باللون الحزين

اختفت في الطريق اللي معه ...
كانت تجيه ...
كيف دربٍ جمعه معها ... خذاه ...
ليتها اختارت سواه ...
تزرع القرقا لياليها ... عليه ...
وحسايف ... حسايف ...


-------------------------------

(حبيبتي يا حلم )

قصت ظفايرها .. ودريت
البارحه .. جاني خبر ..
أدري لبست خاتم عقيق ..
وتقرا لها كتاب .. عتيق ..
كتاب .. واظنه شعر ..
أحفظ أنا حجار الطريق .. اللي يودي لبيتها ..
واعرفها زين ..
واعرفها زين ٍ وانا ..
لا شفتها ولا جيتها ..
قابلتها صدفه .. على شفاه الصحاب ..
همسة أمل حسيتها
ودمعة عذاب ..
وصارت هي الخبر الجديد ..
وعلومها همي الوحيد
وش عاد .. لو كانت بعيد ..
بين الحروف حبيتها ..

حبيبتي .. يا حلم ..
ياللي أعرفك اسم ..
وجهٍ تصوره الحروف .. واتخيله ..
نجم ٍ احس انه قريب .. ما اوصله ..
انتي اللي اعرفه .. زين ..
واللي اجهله انتي ..
حبيبتي .. وياليتها ..
اعرفها زين وانا .. لا شفتها ولا جيتها ..

--------------------------------

(أوقات)

أوقات ياخذنا الحكي ..
وننسى بالحكي أوقات ..
واوقات .. يا ليت الكلام سكات ..
يجرحنا الحكي ..
اسهر .. مع حبيبي .. يا قمر الكلام ..
لين يغفى حبيبي .. وجروحي تنام ..
ابعد عن حروفي .. وعن المي وخوفي ..
وابحر في سفينه .. عن بحر الظلام ..
وصلنامدينه .. من عطر وغمام
انا وين القى كلام .. ما مر فــ كلام
اوقات .. يا ليت الكلام سكات ..
يجرحنا الحكي ..
بغني لعيونك .. في حزني وفرحي
وبكتب عيونك .. قصيده لجرحي
واخلي ابتسامك .. دموعك كلامك
قمر هالسوالف في ليل السكوت ..
ولو الف نجمه في عيني تموت ..
في حزني أحبك .. ويأسي أحبك ..
أحبك .. مأقول أوقات

-----------------------------

(تعالي)

عتيم الليل ...
قمرنا من زمان والله ... فقد نوره ...
عتيم الليل ...احس النظره تتكسر ...
على سوره ..

سهرنا ... في عتيم الليل ... حزين الهمس ...
قدرنا ... ننتظر باكر ... شعاع الشمس ...
تعالي ... طالت الغيبه ... وانا مشتاق ...
انا مشتاق ... انا الاشواق ... انا العشاق ...
تعالي من جسور الليل ... تعالي ضي ...
تعالي في هجير العمر .. حنان وفي ..
وربي ... طالت الغيبه
حنون الليل ... وصوتك همسة التحنان ..
حنون الليل .. بيروي بالامل عطشان ...
حنون الليل .. وانت بتسمعي صمتي ...
تحسي بي ...
تقاسي فيّ تعذيبي ...
تشديني من الامواج ...
ترسّيني على مينا ... وصوتك في ليالينا ...
أبد ساري ...
حنون الليل ... وانت الريح والساري ...
تعالي ... طالت الغيبه
وربي طالت الغيبه ..

---------------------------

(جرحي بخير )ومرت سنه .. على فراقك
على صوتك .. واشواقك
غريب كيف االزمن يرحل
واحلام العمر .. تذبل ..
سنه مرت .. وانا أول ..
حبيبٍ يوقد الشمعه
لجرحه في يوم ميلاده
هلا .. بالحب .. واعياده
وكل عامٍ .. وجرحي بخير

مشيت دروبنا .. خطاوي قلوبنا
ومريت الوعد .. وعدنا العام
ماكان الوعد .. ولا الأيام .. هي الايام
وما ادري ليه هالشارع .. نسوه الناس
ومتى هالمقعد الخالي .. يجوه الناس
حبيبي .. ليه فـ غيابك .. يغيبوا الناس
حبيبي .. ايه والله حبيبي .. ايه والله
نساني العمر.. لو انساه
نساني الفرح .. لو انساه
احبه .. ما ظهر نجم .. ونبت عشب .. وسرى براق
أحبه .. لا زمن يشقي جروحي .. لا جفا .. وفراق
أنا هذا الهوى كله .. وقلبي آخر العشاق ..

---------------------------


(أجمل الحزن)


يا اجمل الحزن .. لدموعك سلام
من حبيبٍ ... بقى منه الكلام
وين انا منك .. غربني الزمان
وخانني النور ... وابعدني الظلام
لو بعزيك ... سالت دمعتي
تدري الدمع في حبك ... حرام
لو بواسيك ... مايكفي الهوى
ولو أبي ... عذر مايكفي الغرام
أعطنى من عذابك يا البعيد
صرخةٍ ... تجعل ظلوعي حطام
آه ...لو في يدي أبكي معاك
قطرةٍ مادرى عنها الغمام
ماابخل الوقت ... يحرمني البكا
وانت لجلك حرمني الإبتسام
يا اطهر الحزن ... لو كان القصيد
يكشف الغم عن بدر التمام
لكتب الشمس شعرٍ في سناك
وامحي إمن السما...عج وكتام
ياعسي البدر نوره مايغيب
عن حبيبٍ بقي منه الكلام

------------------------------

(المحـــبه أرض)
المحبـة أرض والفرقـا أراضــي
والزمن كله تـرى لاغبـت ماضـي
والله إنـي مـا أشـوف إلا عيونـك
إن رحلت اليوم أو طـوّل مراضـي
قالـوا العـذّال والعـذّال مـرضـى
وش بلا حالك من الاشـواق قاضـي
قلت يهجرني حبيبـي ليـن يرضـى
علّموا الظالم ترى المظلـوم راضـي
جرّحوني في هواك وقلـت أبشكـي
ماهو من جرحي ولكن لإعتراضـي
وش علي لو قطّعوا لاجلك عروقـي
من رضى بالحب .. يرضيه التغاضي




-----------------------------------------------------



(ألا الهـــــــــوى)

ابعتذر ... عن كل شيء ...
إلا الهوى .. ما للهوى عندي عذر ..
ابعتذر .. عن أي شي ..
إلا الجراح .. ما للجراح إلا الصبر ..
إن ضايقك اني على بابك أمرّ ...
ليلة ألم ... واني على دربك مشيت عمري وأنا
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
ا تصدقي ... ما اخترت أنا أحبك ...
ما احدٍ يحب اللي يبي ...
سكنتي جروحي غصب ...
ياحبي المرّ ... العذب ...
ليت الهوى وانتي ... كذب ...
كان اعتذر لك عن هواي ...
ما أقول أنا ... كوني معاي ...
ان ضايقك اني على بابك أمرّ ...
ليلة ألم ...
واني على دربك مشيت عمري وأنا ...
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
الله كريم .. حبك ... يكون ...
همي القديم ...
وجرحي القديم ...
والله عليم ... يا أحلى العيون ...
ان الفراق ... جزا الفراق ...
ابوعدك ... كان الطريق بيبعدك ...
بامشي الطريق ...
وكان الجحود بيسعدك ...
مالي رفيق ...
ابجمع أوراق السنين ... وأودعك ...
كان الفراق اللي تبين ... الله معك ...



-------------------------------------


(انفاس )

يازين مافي العيون نعاس
والقلب مشغول بهمومه
اما معي نطرد الهوجاس
والا لك النوم وحلومه
هذي نجوم السما .. جلاس
وعيبٍ على العاشق القومه
لاجل الهوى عذبونا الناس
ومن بيح السد ما الومه
انفاسنا ماغدت انفاس
من حرها دوم مكتومه

















من مواضيع angle girl
عرض البوم صور angle girl رد مع اقتباس
قديم 03-04-2014, 02:41 PM   المشاركة رقم: 2
ساحرة الاجفان

البيانات
ساحرة الاجفان غير متواجد حالياً
التسجيل: Nov 2011
العضوية: 5
أخر تواجد [+]
عدد النقاط: 1140
ساحرة الاجفان has much to be proud ofساحرة الاجفان has much to be proud ofساحرة الاجفان has much to be proud ofساحرة الاجفان has much to be proud ofساحرة الاجفان has much to be proud ofساحرة الاجفان has much to be proud ofساحرة الاجفان has much to be proud ofساحرة الاجفان has much to be proud ofساحرة الاجفان has much to be proud of


كاتب الموضوع : angle girl المنتدى : مملكة الشعر - همس القوافي - اشعار مكتوبة - قصائد متنوعة - قصائد غزل -قصائد حزن - قصائد مدح
افتراضي

شكرا ع الطرح المميز فعلا
عاشت الايادي

وٍنحن دوٍمآ نترٍقبٌ آلمَزٍيدْ
ودٍيٌ
















من مواضيع ساحرة الاجفان
عرض البوم صور ساحرة الاجفان رد مع اقتباس
إضافة رد

الكلمات الدلالية (Tags)
2014, لشعار, المحسن, الجديده, الشاعر, تحميل, بحر, بو, عبد, عبدالمحسن, قصائد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن 03:00 AM



SEO by FiraSEO v3.2 .
Powered by vBulletin® Copyright ©2000 - 2017, Jelsoft Enterprises Ltd. TranZ By Almuhajir

هذا الموقع يستعمل منتجات MARCO1

منتدى روعه احساس -